المدينة الباسلة بورسعيد
المدينة الباسلة بورسعيد
عمرك زورت بورسعيد قبل كده؟؟؟؟
كان إنطباعك عنها أيه؟؟؟؟؟
أنا زورتها
تعالى شوف إنطباعى عنها ايه
بورسعيد
بورسعيد البلد دى باسلة وجميلة مع إنى ماشوفتش فيها أى جمال غير اللى هقولكوا عليه
البلد دى تنزلها تشم ريحة الحرب فيها بيوت كتير لسه فيها آثار الحرب
بيوت أعتبرها أثرية لكنها عتيقة لأن كتر الحروب مخالتش للأثر عمر يعيشة , أول بلد
تستقبل إى مصيبة جاية على مصر
من أول الطريق من دمياط لبورسعيد هتعدى على قبور متناثرة فى الظهير
الصحراوى لشهداء بورسعيد وهتلاقى قبر الجندى المجهول قبر لوحده وسط الصحرا, هتشوف
بقايا أسلحة مرمية كل دبابة وكل مدفع ليه حكاية واقف معاه أسرار وحكايات أبطال محدش
عرفها ولا هيعرفها , بحس إحساس غريب لما بمر على القبور دى محستوش مع حاجة غيرها,
أول مرة روحت بورسعيد كنت فى أولى إعدادى , فى الشتاء, إحساسى بالبلد دى متغيرش من
وقتها لدلوقتى بحرها يرعب فى الشتا أوى بس لذيذ ورايق فى الصيف ,صفير صحراء
بورسعيد بيتكلم تحس أنها بتصرخ بتقول حاجات والبحر بيرد عليها (أول صحراء تحس أنها
مزدحمة)
بواسل وشجعان بورسعيد لما تنزل البلد وتشم ريحة الحرب فيها هتفهموا
بجد ليه سموهم بواسل بورسعيد, الناس دى شافوا كتير -أنا بتكلم على البورسعيدية مش
الوافدين اللى جم على الجهاز أخدوا خيرها وعاشوا فيه- لما رجعوا بلدهم بعد ما
كانوا مهاجرين فى حرب 1973 ملاقوش بيوتهم ولا حتى عرفوا يستدلوا على اى معلم من
معالمها وسكنوا عشش صفيح وإستحملوا سنين عشان بيحبوا بلدهم وكانت دى مشكلة كبيرة
فى عهد مبارك (سكن بورسعيد) وإتحلت على مدار سنين.
البلد دى غريبة تمشى فى شارع تحس بأمان وشارع تانى تحس بخوف وشارع
تالت تحس بفرح وشارع رابع تحس بشجن والمشاعر كلها تلازمك فيها زى ما يكون من كتر
ما وقع فيها شهداء سابوا أرواحهم ومشاعرهم ساكنة البلد دى
ناس كتير يقولوا بورسعيد مسكونة (فيها عفاريت يعنى) الحقيقة أنهم حسوا
بأرواح الشهداء فيها , حسوا بتغير مشاعرهم ما بين لحظة والتانية مجرد ما بدل
الشارع أو مر على بيت , هو لو قذيفة نزلت علينا دلوقتى ومتنا على حالنا ده مش
هتفضل الروح متعلقة بالمكان وبتعمل نفس الحاجة اللى بتعملها , عالم ما بعد الموت
إحنا منعرفش عنه حاجة , عالم البرذخ بردو مهما قرأنا فيه مش هنوصل لحاجة غير أنه
فعلا مذكور فى القرآن , بس هى أرواح الشهداء مش عفاريت
ده كله ممكن يكون ليه تفسير حتى لو بنريح نفسنا وبنرضى فضولنا بيه,
الشئ الأغرب اللى مالوش تفسير عندى هى قيلولة بورسعيد بعد الضهر فى البلد دى غير
أى بلد تانية الشمس ساطعة جدا والشوارع بيبان إتساعها وبيخيم على المنطقة اللون
الأصفر الساطع , اطول فترة قيلولة ,بحس بقلق وخوف وأنظر للسما بترقب وبراقب الطقس
أمتى الشمس تهدى نورها الغاضب ده
سألت صديقة ليا عن الوضع ده وسببه وكان
ردها:إنت ناسية إن حرب 73 كانت الساعة 2 الضهر.
أنا:يعنى إية, يعنى الجو بيستعيد الحدث تانى, ولا طاقة البلد جاذب
دائم لطقس اليوم ده , ولا أفلام الخيال العلمى.
كنت أتمنى أعيش فى بورسعيد بس عشان أراقب الجو وحركة الشمس والنجوم
بلد مختلفة عن أى بلد فى مصر , كل بلد ليها روح واحدة إنما بورسعيد
غير
بورسعيد بلد الخير والحرب
بورسعيد معشوقة الشهداء
ليست هناك تعليقات